THEATRUM Catoptricum

THEATRUM Catoptricum

in Musaeo Kircheriano, Instrumentum est, quô quaestionem inter Physicos tam celebrem de Infinito actu, Auctor pluribus planis speculis ingeniose decidere conatur Cista est sub forma Theatri, quae ex interiore parte undiquaque planis speculis circumvestita est. Specula haec ex parte posteriori, non ad latus seu angulum rectum, sibi invicem coniuncta sunt, sed ad angulum acutum, unde in cavum quatuor laterum se arcuat, Planum vero horizontale quadrilaterum est, quod in centro super axem mobilem convolvitur et ita quadrivatiam obiicit figuraum seu planorum differentiam. Sic specula plana mutuatâ reflexione, unum alteri obiectorum planorum species reflectunt, communicant et multiplicant, semperque easdem species recolligendo optice diminuunt, ut easdem numerare impossibile sit, adeoque infinitum actu spatium repraesentent. Vide ergo mox viridatiorum ad utramque partem se optice protendentium series, ut oculus tuus tali labyrinthô delusus, in infinitum spatium et campos protractum se pu tet. Mutatô mox planô machina te in tam uberem et locupletem Bibliothecam introducit, ut eius apparatu attonitus, librorum

incredibilem copiam te videre fateri cogaris. Quae dum tibi ab oculis subducitur, se visendum sistit magnificentissimorum Palatiorum et Fabricarum Theatrum; quô evanescente, ecce Triclinium omni adornatum fructuum florumque genere, vel gustum allectantium ciborum tragematumque delitiis abunde refertum intuearis. Ad cuius imitationem, varias scenicas proiectiones, ornatissima conclavia, infiniti columnarum productarum ordines, varia ambulachrorum diverticula, horti omni florum plantarumque genere instructissimi, mensae omni cupediarum genere refertissimae, thesauri inexhausti, anfractus infiniti etc. repraesentari possunt. Georg. de Sepibus in Collegii Roman. Societ. Ies. Musaeo p. 30. et 31.